Gúmmíkurl á sparkvelli við Heiðarskóla

Ágætu íbúar Hvalfjarðarsveitar

Í ljósi umræðunnar sl. daga varðandi gúmmíkurl í gervigrasvöllum skal upplýst um stöðu mála hér hjá okkur í Hvalfjarðarsveit.

Síðast liðið haust var haft samband við innflytjanda gervigrassins í Heiðarskóla og óskað eftir upplýsingum frá honum um gúmíkurlið á sparkvellinum. Samkvæmt upplýsingum söluaðilans  uppfyllir  kurlið í grasinu í Heiðarskóla alla alþjóðlega staðla um kurl í gervigrasi. Þrátt fyrir þessar upplýsingar hefur verið haft samband við Umhverfisstofnun til að fá upplýsingar um þeirra afstöðu og aðgerðir í þessum málum. Umhverfisstofnun hefur tekið sýni af kurli í gervigrasi á nokkrum stöðum á landinu og sent erlendis til greiningar. Umhverfisstofnun hefur fengið upplýsingar um gerð kurlsins í vellinum við Heiðarskóla og er beðið  upplýsinga um hvort kurlgerðin sé sambærileg þeim sem sendar hafa verið í áðurnefnda greiningu.

Um leið og frekari upplýsingar hafa borist frá Umhverfisstofnun varðandi málið mun ég skýra ykkur íbúum frá þeim niðurstöðum.

Með bestu kveðju

Ólafur Melsted

skipulags- og umhverfisfulltrúi