Ársreikningur Hvalfjarðarsveitar 2024
Á 417. fundi sveitarstjórnar Hvalfjarðarsveitar þann 26. mars sl. var ársreikningur Hvalfjarðarsveitar fyrir árið 2024 samþykktur, sjá HÉR.
Rekstrarniðurstaða sveitarfélagsins samkvæmt ársreikningi A og B hluta var jákvæð um 368,9mkr. Rekstrartekjur sveitarfélagsins á árinu 2024 námu rúmum 1.568mkr. samkvæmt rekstrarreikningi fyrir A og B hluta en þar af námu rekstrartekjur A hluta tæpum 1.562mkr.
Rekstrargjöld A og B hluta árið 2024 voru alls 1.354,9mkr. Veltufé frá rekstri var 27,43% og veltufjárhlutfall 16,68%.
Heildareignir sveitarfélagsins í árslok 2024 voru 4.918,5mkr. og heildarskuldir námu 125,6mkr. og er þar einungis um skammtímaskuldir að ræða, engar langtímaskuldir.
Eigið fé sveitarfélagsins í árslok 2024 nam 4.792,9mkr. samkvæmt efnahagsreikningi og eiginfjárhlutfall var 97%.
Eitt af fjárhagslegum viðmiðum sveitarfélaga skv. sveitarstjórnarlögum er skuldaviðmið. Það er áfram jákvætt, fer úr 124,14% í 114,06% árið 2024 en veltufé er áfram umtalsvert hærra en skuldir. Rekstrarjöfnuður sveitarfélagsins síðustu þrjú ár (samanlögð rekstrarafkoma á þriggja ára tímabili) er 869,9mkr.
Rekstarniðurstaða ársins 2024 var tæpum 212mkr. jákvæðari en áætlun ársins gerði ráð fyrir og helgast það af hærri rekstrar- og fjármagnstekjum sem og lægri rekstrarkostnaði en áætlaður var. Almennt voru einstaka málaflokkar og deildir innan áætlunar ársins 2024.
Handbært fé sveitarfélagsins er nánast óbreytt milli áranna 2023 og 2024 eða rúmur 1,9 milljarður þann 31. desember 2024 og er styrkur af því til framtíðar innviðauppbyggingar, s.s. byggingu nýs íþróttahúss sem nú stendur yfir, byggingu nýs leikskóla sem nýverið voru opnuð tilboð í arkitekta- og landslagshönnun fyrir, gatnagerðar nýs áfanga Melahverfis auk annarra framkvæmda sem fyrirhugaðar eru, s.s. áframhaldandi göngu- og reiðhjólastígagerð. Staða handbærs fjár styrkir þá vegferð sveitarfélagsins að framkvæma án lántöku.
Heildarfjárfestingar sveitarfélagsins árið 2024 námu nettó 409,7mkr. en þar af voru 391,4mkr. til byggingar nýs íþróttahúss við Heiðarborg og 31,6mkr. til kaupa nýrrar slökkvibifreiðar.
Hvalfjarðarsveit 31. mars 2025
Linda Björk Pálsdóttir
sveitarstjóri