750 íbúa markinu náð!

Í dag, 20. október, eru íbúar Hvalfjarðarsveitar 750 talsins og hefur þeim fjölgað um 63 eða 9,2% frá því 1. janúar sl. þegar þeir voru 687. Ef litið er aftur til 1. janúar 2021 er fjölgunin 103 íbúar eða tæp 16% enda mikil uppbygging verið bæði í dreifbýli og þéttbýliskjörnum, Melahverfi og Krosslandi. Búast má við að uppbygging haldi áfram á næstu árum enda mikið í byggingu og framundan í þeim efnum.

Meðalaldur íbúa er 41,1 ár og er elsti íbúinn 93 ára. Hlutfall íslenskra ríkisborgara er 86,8% og erlendra ríkisborgara 13,2%. Konur eru 44,5% íbúa, karlar 55,3% og kynsegin/annað er 0,1% íbúa.

Í Hvalfjarðarsveit eru 235 íbúðir í sérbýli, 33 íbúðir í fjölbýli og 570 sumarhús, sjá má þróun frá árinu 2005 á myndunum hér fyrir neðan.