Fjölskyldu- og frístundanefnd

Á fundi sveitarstjórnar nr. 312 baðst Sunneva Hlín Skúladóttir lausnar frá störfum í fjölskyldu- og frístundanefnd og var Elín Ósk Gunnarsdóttir skipuð í hennar stað.

Nefndin þakkar Sunnevu fyrir samstarfið og óskar henni velfarnaðar og býður Elínu velkomna í nefndina.

Nefndin samþykkti að veita forvarnarstyrk að upphæð 500.000 kr. í forvarnarnámskeiðið Verkfærakistan sem ætluð er fyrir kennara úr skólasamfélagi Hvalfjarðarsveitar. Málið fékk umfjöllun á 13. og 14. fundi nefndarinnar.

Nefndin vísar málinu til afgreiðslu sveitarstjórnar.

Nefndin uppfærði reglur um félagslega heimaþjónustu og gerði minniháttar breytingar.

Nefndin vísar uppfærðum reglum til afgreiðslu sveitarstjórnar.

Nefndin uppfærði reglur um félagslega liðveislu og gerði minniháttar breytingar en frestar afgreiðslu málsins fram á næsta fund nefndarinnar.

Formaður fór yfir stöðu málsins.

Frístunda- og menningarfulltrúi fór yfir starfsemi og vinnuskýrslu Vinnuskólans.

Nefndin þakkar starfsmönnum fyrir vel unnin störf.

Frístunda- og menningarfulltrúi fór yfir hvernig fyrirhugað félagsstarf aldraðra í vetur gæti farið fram m.t.t. áhrifa Covid-19. Nefndin leggur áherslu á að farið yrði eftir fyrirmælum sóttvarnarlæknis og yfirvalda í öllu félagsstarfi á vegum sveitarfélagsins.
Starfsmenn Opna hússins verða Sigrún Sólmundardóttir og María Sigurðardóttir en ekki er búið að ráða starfsmann í sundleikfimina.

Frístunda- og menningarfulltrúi fór yfir hvernig starfsemi Heiðarborgar þ.e. sundlaugar og íþróttahúss yrði í vetur eftir skólalokun. Sundlaugin verður opin mánudaga-fimmtudaga frá klukkan 16:00-21:00 og laugardaga frá klukkan 10:00-15:00. Íþróttahúsið og þreksalurinn verða opin á sama tíma.

Nefndin leggur áherslu á að sóttvarnir verði í lagi og farið verði eftir fyrirmælum sóttvarnarlæknis hverju sinni.

Frístunda- og menningarfulltrúi fór yfir með nefndinni hvernig nýting á tómstunda- og íþróttastyrkjum er. Nefndin telur að nýtingin sé viðunandi og hvetur foreldra/forráðamenn til að kynna sér vel þau úrræði sem bjóðast á sviði íþrótta- og tómstunda fyrir börn og ungmenni.

Nefndin leggur til að frístunda- og menningarfulltrúi ásamt Ungmennaráði Hvalfjarðarsveitar fari yfir þá möguleika sem bjóðast í tómstundum og íþróttum fyrir börn og ungmenni sveitarfélagsins.